Nagkomedya si US President Donald Trump nga wala pa siya mahimong target sa International Criminal Court o ICC, apan wala niini gisalikway ang posibilidad nga mahimo siyang maapil sa imbestigasyon sa umaabot.
Gipahayag ni Trump ang maong komento atol sa cabinet meeting sa Camp David niadtong Biyernes, local time, samtang padayon nga gipalig-on sa iyang administrasyon ang kampanya aron i-boycott ug pahuyangon ang international tribunal.
Sumala pa sa pangulo sa Amerika, wala siya’y nahibal-an nga adunay kaso o imbestigasyon batok kaniya sa ICC, apan posible aniya nga mahitabo kini sa umaabot, nga gisabayan sa katawa sa mga miyembro sa iyang gabinete.
Dugang pa niini, mitubag si Trump sa pahayag sa iyang top diplomat nga si Marco Rubio, nga nagpadayon sa pagdepensa sa posisyon sa Estados Unidos batok sa ICC.
Matud pa ni Trump, dili siya ang ginapanalipdan sa ilang administrasyon, kondili si Benjamin Netanyahu ug uban pang lider nga giatubang sa pag-usig sa maong korte.
Matud pa, nagpagawas ang ICC og arrest warrant batok kang Netanyahu niadtong Nobyembre 2024 may kalabotan sa gubat ug mga alegasyon sa war crimes sa Gaza.
Lakip sa mga argumento sa Estados Unidos ug Israel mao nga dili sila mga miyembro o signatory sa Rome Statute, ang kasabotan nga nagtukod sa ICC.
Samtang, naglunsad usab ang administrasyon ni Trump og mas pinalapad nga kampanya aron awhagon ang ubang mga nasud nga mobiya sa ICC.
Kinumpirma ni Secretary Rubio nga lima na ka mga nasud ang nagpahibalo sa ilang plano nga mohawa sa korte, lakip ang Chad ug Venezuela.
Sa pagkakaron, gihulagway ni Rubio ang ICC isip usa ka “illegitimate international organization,” samtang padayon ang debate sa internasyonal nga komunidad kabahin sa papel ug awtoridad sa maong tribunal.
with headline
