Misugod ang mga presinto sa Thailand niadtong Domingo, Pebrero 8, alang sa usa ka kritikal nga botohan, samtang ang nasud naningkamot sa pagbangon gikan sa serye sa pag-ilis sa liderato ug pagkaguba sa mga politikal nga partido sulod sa miaging duha ka tuig.
Ang pinakadako nga hagit alang sa bag-ong gobyerno mao ang hinay nga ekonomiya, ang tensyon sa border uban sa Cambodia, ug ang nagkadaghang problema sa transnational cyberscam networks sa Southeast Asia.
Sulod lamang sa duha ka tuig, nakasinati ang Thailand sa paspas nga pag-ilis sa mga punong ministro. Si Srettha Thavisin sa Pheu Thai Party nahimo nga lider niadtong Agosto 2023 human sa botohan, apan gihunong sa Senado ang Move Forward Party nga nidaug sa boto.
Si Paetongtarn Shinawatra, ang kinamanggorang anak ni kanhing lider Thaksin Shinawatra, mipuli ni Srettha niadtong Agosto 2024, apan dali ra usab siyang napalagpot sa Constitutional Court tungod sa mga isyu sa etika sa pag-appoint sa opisyal.
Karon, si Anutin Charnvirakul sa Bhumjaithai Party ang naglingkod isip Prime Minister sukad Setyembre 2024, human makuha ang suporta sa parlamento pagkahuman sa pagkaguba sa mga naunang alyansa. Siya na ang ikatulo nga lider sa nasud sulod sa duha ka tuig.
Sumala sa konstitusyon nga gisulat sa militar niadtong 2017, nagpabilin nga kusog ang gahum sa mga dili pinili nga institusyon sama sa Senado ug Constitutional Court.
Sa kasamtangan nga eleksyon, gilauman nga magpadayon ang komplikadong negosasyon sa mga partido tungod kay lisod pa gihapon makab-ot ang “outright majority” sa usa ka kontrolado nga sistema sa politika sa Thailand.
