Nagpirma og kasabutan ang 10th Infantry (Agila) Division, University of Mindanao ug Department of Science and Technology Region XI alang sa Project AgilaCom.
Ang 10th Infantry (Agila) Division sa Philippine Army ubos sa pagpanguna ni Major General Alvin Luzon opisyal nga mipirma sa Terms of Reference alang sa Project AgilaCom o “A Multi-Communications Integrated System” didto sa University of Mindanao Matina Campus niadtong Mayo 6, 2026.
Tumong sa proyekto ang paghimo og usa ka luwas, hiniusang ug interoperable communications platform nga makatabang sa mission command, situational awareness ug operational coordination sa mga tropa labi na sa mga geographically isolated ug conflict-affected areas.
Ang Project AgilaCom naglangkob sa cross-platform communications, real-time GPS tracking ug secure Web Real-Time Communication o WebRTC voice capability nga gigamitan og military-grade mutual Transport Layer Security o mTLS.
Ang sistema ginadebelop sa University of Mindanao ubos sa DOST-PCIEERD Research and Development Initiative kauban ang 10th Infantry (Agila) Division, 10th Signal (Masaligan) Battalion, Signal Regiment, Department of Information and Communications Technology Region XI ug DOST XI.
Mitambong usab sa ceremonial signing sila ni Mrs. Maria Linda Arquiza ug Dr. Guillermo Torres Jr. nga parehong nagpahayag og suporta sa mga inisyatiba nga nagpalambo sa innovation, research ug teknolohiya alang sa nasudnong kalamboan ug seguridad.
Matod ni Major General Luzon, ang maong proyekto nagpakita sa pasalig sa Division sa innovation ug modernization aron mapalig-on ang mission effectiveness.
Dugang pa niya, ang Project AgilaCom usa ka ehemplo sa importansya sa panagtambayayong tali sa militar, akademiya ug mga ahensya sa gobyerno aron makahimo og mission-oriented technologies nga makapalig-on sa operational readiness, situational awareness ug secure communications capabilities sa mga sundalo.
Gikonsiderar usab ang proyekto isip usa sa mga best practices sa 10th Infantry (Agila) Division tungod kay nagpalambo kini sa capability enhancement pinaagi sa innovation, interoperability ug strategic collaboration isip suporta sa modernization efforts sa Philippine Army.
