Gipanghimakak sa Malacañang Palace ang alegasyon ni Sen. Imee Marcos nga adunay kunoy pamugos ug pagpanghadlok batok sa mga magbabalaod aron suportahan ang impeachment complaint batok kang Sara Duterte.Sumala pa kang Usec. Claire Castro, walay basihan ang maong mga alegasyon kon dili kini suportahan og klaro ug konkretong ebidensya.
Matud pa niya, mas mahimong katuohan ang maong mga pasangil kon adunay mapakitang lig-on nga ebidensya. Dugang pa niini, gipadayag usab sa opisyal sa Palasyo nga daw naanad na kuno ang pipila ka personalidad sa pagpatuyang og mga haka-haka ug intriga imbis nga maglatid og konkretong ebidensya. Lakip sa iyang gihisgutan si kanhi Rodrigo Duterte kalabot sa maong isyu.
Kahinumduman nga una nang gipadayag ni Sen. Imee Marcos pinaagi sa usa ka video statement nga adunay pipila ka miyembro sa House of Representatives of the Philippines ug Senado nga giingong giatubang ang pagpanghadlok ug hulga nga kasuhan kon dili mosuporta sa impeachment complaint batok kang Sara Duterte.
Matud pa sa senadora, adunay mga magbabalaod nga kunoy gihulgaang pasakaan og reklamo sa Office of the Ombudsman, samtang giingon usab niini nga gigamit kuno ang pipila ka ahensya sama sa Department of Justice, National Bureau of Investigation, ug Securities and Exchange Commission aron ipiton ang mga dili pabor sa impeachment.
