Nakadesisyon ang National Unity Party (NUP) ug Liberal Party (LP) nga pasagdaan ang ilang mga miyembro nga moboto base sa ilang konsensya sa umaabot nga plenary vote sa Kamara de Representantes nga may kalabutan sa impeachment ni Vice President Sara Duterte.
Sumala kay NUP chairman ug Deputy Speaker Ronaldo Puno, nga walay ipahigayon nga party stand ang ilang grupo aron pag respeto sa ug adunay kagawasan ang mga mambabalaod nga magpatuman sa ilang katungdanan ilawom sa konstitusyon.
Giklaro sab ni Puno nga nagpabilin nga kaalyado sa administrasyon ang NUP, apan kung ang impeachment ang pagahisgutan angay nga mangibabaw ang sarili nga hukom sa matag miyembro.
Samtang, gikumpirma sab ni Liberal Party president ug kanhi Deputy Speaker Lorenzo Tañada III nga “consience vote” sab ang mamahimong baruganan sa ilang partido. Segun pa niya, nga nadesisyonan kini sa ilang House contingent sa usa ka meeting niadtong Marso 3.
Ang pamahayag ni Tañada kini human sa desisyon ni Caloocan Rep. Edgar “Egay” Erice nga dili motambong sa botohan, tungod sa gikatuohang isyu sa impeachment nga usa ka bunga sa panagbangi sa pamilya nga Duterte ug Marcos.
Sa panig sab sa Patrido Federal ng Pilipinas (PFP), butyag ni House Assistant Majority Leader Javier Miguel Benitez nga adunay nadesisyonan ang ilang partido human sa ilang pagpulong mahitungod sa pagdungog. Gani, midumili siya nga isulti ang ilang mahimong boto hangtod sa mismong plenaryo.
Mibalibad si Benitez sa mga taho nga adunay pagpanghulga o suhulan sa kongreso nga may kalabutan sa impeachment, ug giklaro nga ang nahitabo usa ka “consensus building”.
Sa kasamtangan, adunay kinatibuk-ang 318 nga miyembro sa Kamara. Gikinahanglan nga dili mo ubos sa 1/3 o 106 ka boto aron ma-aprobahan ang Articles of Impeachment ug aron mapasa kini ngadto sa Senado nga maoy mamahimong impeachment court.
