Kumpiyansa ang Philippine Natiional Police (PNP) nga madakpan sa mga awtoridad ang negosyanteng si Atong Ang ug kanhi Ako Bicol Party-list Rep. Zaldy Co nga parehong nag-atubang sa high-profile cases.
Sumala kay PNP chief Jose Melencio Nartatez Jr., padayon ang operasyon sa kapulisan gamit ang mga nakalatag nga plano ug koordinasyon sa nagkadaiyang ahensya aron masuta ang duha.
Nag-atubang si Ang ug uban pa nga akusado sa mga kaso nga kidnapping with homicide ug serious illegal detention nga may kalabotan sa pagkawala sa mga pipila ka sabungero.
Niadtong Abril, nagpagawas sab ang Interpol red notice batok kay Ang, samtang gikataho sab nga nakita si sa CALABARZON. Aduna’y ganti nga P20 million para sa mga impormasyon sa makatudlo sa maong pugante.
Samtang, nagpagawas sab og warrant of arrest batok kay Co ug sa laing 17 nga indibidwal, apil na niini ang pipila ka mga opisyal sa Department of Public Works and Highways (DPWH) ug mga director sa Sunwest Corp., nga may kalabutan sa flood control project.
Gikasuhan sab sa Office og the Ombudsman si Co og graft ug malversation sa Sandiganbayan tungod sa giingong palpak nga P289-million nga flood control project sa Oriental Mindoro.
Kahinumduman nga niadto Abril 16, gipahayag ni Pangulong Ferdinand Marcos Jr. nga nasikop na si Co sa prague human naharang sa German border tungod sa isyu sa iyang travel documents.
Gani, giklaro kini ni Justice Secretary Fredderick Vida nga wala na sa kustodiya sa Czech authorities si Co.Sumala sa mga taho, ulahing nakita si Co sa France niadtong Mayo 1.
