DAVAO CITY – Gitangtang sa management sa Coca Cola Plant nga nahimutang sa Ulas ning dakbayan sa Davao ang gibitay nga tarpaulin sa gate nga una nang gipaskil kagahapong adlawa.
Sa pagpanubay sa Bombo Radyo Davao, nagpabiling tak-om ang management mahitungod sa ilang gipagawas nga advisory.
Ning kasamtangan, mibalibad ang maong management nga maghatag og dugang pahayag.
Gisulayan sa bombo radyo sa pag kontak ang pipila ka opisyal sa maong kompanya apan matud pa, dili kini mamahimong makig-atubang sa media gumikan adunay importanteng meeting nga tambungan ang ilang official spokesperson / Director for Corporate & Regulatory Affairs nga si Atty. Tañada.
Kahinumduman nga kagahapon, gi-paskil sa gawas sa gate sa nahisgutang beverage company ang tarpaulin nga nagkanayong suspendido ang ilang operasyon gumikan sa nihit matud pa nga suplay sa bottlers o refined sugar nga maoy nag-unang sagol sa ilang produktong softdrinks ug uban pang mga sweetened beverages.
Ang maong pabrika ang nagabuhat ug naga-suplay sa ilang mga produkto dili lamang sa Davao Region apan lakip na sab sa mga kasikbit nga mga probinysa sa Mindanao.
