Nakasinati karon og dugang nga pag-atiman ang mga pasyenteng anaa sa mga pampublikong ospital nga ginadumalaan sa probinsyal nga panggamhanan sa Davao de Oro.
Kini mahitungod sa gipanghatag nga wellness kits kanila aron masuportahan ang mas paspas nga pagpaayo nila.
Ang maong inisyatibo, personal nga proyekto ni Governor Raul Mabanglo, kabahin sa padayong pagningkamot sa probinsya sa pagpalig-on sa “kahimsog” o kinatibuk-ang kaayohan sa katawhan.
Sukad sa pagsugod sa bulan sa Marso, mokabat na sa 4,091 ka mga pasyente nga na-admit sa upat ka ospital ang nakadawat na og wellness kits.
Kini naglangkob dili lamang sa mga nag-unang panginahanglan sa ospital kundili gipabati sab sa gobyerno pinaagi niini ang kinasing-kasing nga pag-atiman gawas sa medikal nga serbisyo.
Ang maong kausaban daling nabati sa katawhan.
Sumala ni Renalyn Lorenzana gikan sa Nabunturan, praktikal ang mga sulod niini.
“Maka less mi sa gasto, makatabang kaayo. Karon pa ko kadawat og wellness kit.
Samtang gipunting ni Margie Buyan gikan sa Maragusan nga kumpleto ang sulod sa kit.
“Halos tanan needs naa na diri. Atiman kaayo mi, dako gyud ni nga tabang. Salamat kaayo kang Governor Raul Mabanglo ug Cong. Maricar Zamora-Mabanglo.”
Pipila sad ka mga pasyente gikan sa Davao de Oro Provincial Hospital Pantukan ang nagpaabot sa ilang pasasalamat sa mga nagpaluyo sa proyekto.
“Thank you so much Governor Raul Mabanglo for this kit, makatabang gyud siya sa amua.”
“Salamat kaayo sa naghatag ani kay Governor Raul Mabanglo.”
“Thank you so much sa Governor Raul Mabanglo sa paghatag og kits, dako kaayong tabang sa amua!”
Ang matag wellness kit naglangkob og mga butang sama sa digital thermometer, calibrated glass, alcohol, face towel, tissue, cotton, toothbrush ug toothpaste, shampoo ug bath soap, ug kutsara ug tinidor—mga yano apan hinungdanon nga gamit aron matabangan ang mga pasyente sa pagmintinar sa kalimpyo ug dignidad samtang sila anaa sa ospital.
Gisuportahan usab ang maong programa sa mga District Representatives nga sila Cong. Maricar Zamora-Mabanglo ug Cong. Jhong Ceniza, nga mitabang aron mahimong malampuson ang inisyatibo.
Pinaagi niini, gipakita sa probinsyal nga panggamhanan ang lig-on nga paningkamot sa paghimo sa serbisyong panglawas nga dili lamang maabot sa tanan, kundili puno sab sa pag-amuma ug mas haom sa panginahanglan sa matag pasyente.
