Gibutyag ni US Pres. Donald Trump nga posibleng ipadayon sa United States ug Iran ang negosasyon alang sa kalinaw human mapakyas ang miaging round sa kasabutan niadtong weekend nga nagtumong sa pagpakalma sa tensyon sa Strait of Hormuz.
Bisan paman niini, wala pa’y klarong petsa kung kanus-a ipadayun ang panaghisgot.
Taliwala sa tensyon, miubos gamay ang presyo sa lana sa global market human sa mga timailhan nga magpadayon ang diplomatic talks. Una nang nagpatuman ang U.S. og blockade sa mga pantalan sa Iran isip tubag sa pagsirado sa Strait of Hormuz usa ka kritikal nga agianan sa halos 20% sa global oil supply.
Sumala sa United States Central Command, kapin sa 10,000 ka mga sundalo, mga barkong panggubat ug aircraft ang naka-deploy sa rehiyon alang sa ilahaang planong operasyon.
Sa unang 24 oras, wala’y barko nga nakalusot sa blockade, samtang pipila ka merchant vessels napugos sa pagbalik sa Iranian ports.
Sa laing bahin, nagpasidaan ang Iran nga posibleng targeton niini ang mga barko sa U.S. ug mga kaalyado niini kung magpadayon ang operasyon, ug gitawag ang blockade nga usa ka “piracy.”
