Gisupak sa Davao City Government ang plano sa pagtukod og foreign military facility sa rehiyon, human miguwa ang report nga posibleng magtukod og fuel storage facility sa Davao.
Una nang gipahayag sa Armed Forces of the Philippines (AFP) nga suportado niini ang maong proyekto sa Mindanao kay makatabang sumala pa kini sa pagpalig-on sa depensa ug operasyon sa militar, lakip na sa West Philippine Sea.
Apan gipaklaro sa lokal nga panggamhanan nga dili nila suportahan ang proyekto kung walay direkta nga benepisyo sa publiko, ilabi na karon nga misaka ang presyo sa gasolina ug palaliton tungod sa gubat sa Middle East.
Sumala sa United States Naval Institute, nagplano ang United States Department of Defense nga magtukod og Defense Fuel Support Point (DFSP) sa Southern Philippines sa tuig 2028.
Ang maong pasilidad gilauman nga makaimbak og hangtod 41 milyones ka galon sa fuel ug uban pang produktong petrolyo para sa operasyon militar sa United States.
Hugot usab nga gisupak sa Bagong Alyansang Makabayan ang proyekto, nga ilahang gibutyag nga paglapas sa soberanya sa nasud ug posibleng makapahimutang sa rehiyon isip target sa mga kontra sa U.S.
Sa laing bahin, gipasalig sa AFP nga ang maong pasilidad magpabiling kontrolado sa Pilipinas ug magsilbing panalipod batok sa mga hulga sa seguridad.
