Ipatuman pag-usab sa Land Transportation Franchising and Regulatory Board (LTFRB) ang service contracting program alang sa mga driver sa public utility vehicles (PUV) aron matabangan sila sa pagsagubang sa padayon nga pagsaka sa presyo sa langis.
Sumala sa LTFRB, ilunsad ang programa sa pipila ka ruta sa Metro Manila ug uban pang urban areas aron masiguro ang padayon nga biyahe sa mga commuter.
Nihinay ang operasyon sa ubang PUV tungod sa sunod-sunod nga pagsaka sa presyo sa langis sukad misiklab ang giyera sa Iran niadtong Pebrero 28.
Matod ni acting Transportation Secretary Giovanni Lopez, nangayo na ang ilang ahensya og P1 bilyon sa Department of Budget and Management (DBM) alang sa target nga implementasyon sa Abril 15, 2026.
Sakop sa programa ang mga bus sa EDSA, mga jeep nga nagbiyahe duol sa Light Rail Transit (LRT) ug Metro Rail Transit (MRT), ug uban pang PUV nga moagi sa mga dagkong transport hubs sa Metro Manila.
Ipatuman usab kini sa Davao City, Cagayan de Oro City, ug uban pang urban areas. Una kining gipatuman niadtong 2020 ubos sa Republic Act No. 11494 isip tubag sa epekto sa pandemya, diin gihatagan og matag semana nga subsidy ang mga driver base sa ilang biyahe.
