Gipahibalo ni Department of Trade and Industry (DTI) Secretary Ma. Cristina Roque nga gisuportahan sa Association of Southeast Asian Nations ang ratipikasyon sa ASEAN Petroleum Security Agreement (ASEAN-APSA) aron mapalig-on ang kooperasyon sa suplay sa gasolina sa rehiyon.
Sumala pa ni Sec. Roque, ang maong kasabutan nagtumong sa pag-establisar og coordinated emergency fuel sharing tali sa mga nasud nga miyembro kung adunay oil supply disruption o krisis sa enerhiya. Lakip sa gihisgutan, giingon nga padayon usab ang pagtukod sa usa ka ASEAN-wide power grid aron mas mapadali ug mapahapsay ang pagbalhin ug pagbahin sa kuryente sa tibuok rehiyon.
Dugang pa niini, gipasiugda sa ASEAN ang ilang pasalig nga magpabiling bukas ang kalakalan, likayan ang export bans sa mga batakang produkto, ug palig-onon ang food ug energy security ilabi na sa panahon sa krisis.Sa kasamtangan, giapil usab sa plano ang suporta sa micro, small and medium enterprises (MSMEs) aron mapadayon ang trabaho ug mapalig-on ang ekonomiya batok sa global shocks.
Sa pagkakaron, gilauman nga pinaagi sa maong mga lakang, mas mapalig-on pa ang katakus sa rehiyon sa pag-atubang sa posibleng krisis sa enerhiya ug ekonomiya.
