Nanguna ang Land Transportation Office (LTO) ug Social Security System (SSS) sa listahan sa mga ahensya sa gobyerno nga adunay labing daghan og reklamo niadtong bulan sa Marso, sumala sa Anti-Red Tape Authority (ARTA).
Base sa datos sa ARTA, miabot sa 152 ang kinatibuk-ang reklamo nga ilang nadawat, diin 132 na ang nasulbad ug 20 ang nagpabiling aktibo. Samtang, nakarekord ang SSS og 156 ka reklamo, diin 112 na ang nasulbad ug 44 ang pending pa.
Matod ni ARTA Secretary Ernesto Perez, kadaghanan sa mga reklamo may kalabotan sa pagkalanagan sa serbisyo, dugang nga requirements, ug paglapas sa Citizen’s Charter.
Gibutyag ni Perez nga padayon ang pakig-uban sa ARTA sa mga ahensya aron mapaayo ang ilang serbisyo ug maminusan ang red tape.
Lakip usab sa adunay daghang reklamo ang Bureau of Internal Revenue (BIR), Food and Drug Administration (FDA), Land Registration Authority (LRA), Philippine Statistics Authority (PSA), Department of Education (DepEd), National Telecommunications Commission (NTC), Department of Migrant Workers (DMW), Professional Regulation Commission (PRC), Department of Human Settlements and Urban Development (DHSUD), ug Department of Science and Technology (DOST).
Alang sa mga Government-Owned and Controlled Corporations (GOCCs), apil sa adunay daghang reklamo ang Pag-IBIG Fund, Philippine Health Insurance Corporation, Philippine Postal Corporation, Landbank of the Philippines, ug GSIS.
Bisan paman niini, gikanayon sa ARTA nga kadaghanan sa mga reklamo dali ra aksyunan sa higayon nga mapasa na sa mga angay nga ahensya, ug dako usab ang porsyento sa mga kasong nasulbad.
Dugang pa sa ahensya nga ang gidaghanon sa reklamo dili lang timailhan sa kakulang sa kahusayan kon katakos, kundili may kalabotan usab kini sa kadaghan sa transaksyon nga giatubang sa maong mga buhatan.
