Giabli pag-usab sa Department of Migrant Workers ang panibag-ong batch sa financial assistance alang sa overseas Filipino workers (OFWs) nga naapektuhan sa krisis sa Middle East, ilabina sa Dubai ug Northern Emirates.
Sumala sa DMW, 1,000 slots ang gilayon nga napuno sa bag-ong aplikasyon alang sa one-time financial aid, apan adunay laing batch nga ablihan pag-usab karong Martes alas-8 sa buntag.
Subay sa giya sa Migrant Workers Office sa Dubai, ang aplikasyon ipahigayon sa upat ka batch matag Martes ug Biyernes sulod sa duha ka semana aron masiguro ang hapsay ug accessible nga proseso.
Lakip sa mga kinahanglan isumite sa mga aplikante ang Request for Assistance form, passport bio page, Emirates ID, pamatuod sa overseas employment, ug dokumento nga nagpakita sa work disruption.
Dugang pa niini, makadawat ang mga kwalipikadong OFWs og USD $200 o kapin P12,000 nga ayuda pinaagi sa remittance o Al Ansari Exchange branches sa tibuok UAE.
