DAVAO CITY – Nagpahigayon na matud pa karun ang lokal nga kagamhanan ug swine re-population stage human ang nasinatian nga African Swine Fever (ASF) outbreak sa pipila ka mga Barangay sa Calinan kaniadtong 2020 nga maoy hinungdan nga daghanang binuhi nga mga baboy ang gipamatay.
Nasayran nga gihatud na ang mga “sentinel” pigs sa mga lugar nga una ng naapektohan sa ASF kini alang sa ipahigayon nga re-population.
Subay sumala pa sa surveillance ug monitoring sa Barangay ug sa mga tindahan, nagpabilin karon ang dakbayan nga ASF-free.
Napamatud-an nga walay nay kaso sa ASF gumikan kay negatibo sumala pa sa maong hog disease ang mga sentinel pigs.
Wala sab sumala pay natala nga kaso sa ASF sa mga karne sa palengke ug nasumite na nila ang report ngadto sa regional office sa Department of Agriculture.
Kahinumduman nga kaniadtong Pebrero sa tuig 2020, ang mga barangay sa Lamanan, Dominga ug Inayangan sa Calinan District ang labing naapektohan sa ASF.
Sa milabay nga tuig gisugdan ang pagpanghatag ug mga “sentinel” piglets sa mga gagmay nga areas ug wala na silay natala nga kaso sa ASF sulod sa 90 ka adlaw sa walo ka mga rehiyon diin anaa sa 8,000 ka small hog raisers ang nakabenepisyo niini.
Una ng gibutyag ni Agriculture Secretary William Dar nga ang sentinelling mao ang usa sa mga nakitang pamaagi sa kasamtangang administrasyon alang sa swine re-population program arun nga mapasaka ang hog production ug mapabilin ang bastante nga supply sa karne.
