Gi-report sa Bureau of Immigration (BI) nga nagpabilin gihapon nga taas ang ihap sa international passengers sa nasud bisan pa sa mipatigbabaw nga tensyon sa Middle East nga nakaapekto sa pipila ka flight operations.
Sumala ni BI Commissioner Joel Anthony Viado, miabot sa 782,344 ang total passenger volume sa international ports sulod sa usa ka peak week, diin halos pareho ang arrivals ug departures.
Gikan Marso 29 hangtod Abril 5, natala ang 391,243 nga miabot ug 391,101 nga mibiya sa Pilipinas.
Sa unang quarter sa 2026, mas taas usab ang passenger count kung itandi sa susamang panahon sa 2025.
Apan gibutyag sa ahensya nga mikunhod ang biyahe paingon ug gikan sa mga nasud sa Middle East tungod sa padayon nga tensyon sa rehiyon. Naglaum ang BI nga kung mohupay na ang tensyon, mosaka pag-usab ang gidaghanon sa mga pasahero padulong sa Gulf countries.
