Giduso karon sa Kamara de Representante ang usa ka sugyot balaodnon nga magbawal sa pagbabag sa mga estudyante nga adunay wala pa nabayran nga tuition ug uban pang obligasyon nga makaapil sa graduation ceremonies.
Ubos sa House Bill (HB) 8618 nga gisumite ni Parañaque City 2nd District Rep. Brian Yamsuan, tumong niini nga masiguro nga tanang estudyante makasinati sa ilang graduation bisan unsa pa ang ilang kahimtang sa panalapi.
Sumala ni Yamsuan, ang graduation usa ka importante nga kalampusan dili lamang sa estudyante kundi lakip sa pamilya nga nagsakripisyo, busa dili kini angay ipugos nga dili matuman tungod sa kakuwang sa kwarta.
Apan gipaklaro sa sugyot nga bisan bawal pugngan ang pag-apil sa graduation tungod sa utang, giila gihapon niini ang katungod sa mga eskwelahan sa pagsingil sa wala pa nabayran nga bayarin.
Sakop sa sugyot ang tanang public ug private basic education institutions, higher education institutions, ug technical-vocational schools nga adunay kurso nga molapas og usa ka tuig.
Aron matino ang mga kwalipikadong estudyante nga kabahin sa disadvantaged sector, mahimong mag-isyu og certification ang local social welfare officer o DSWD regional officer alang sa mga naapektuhan sa kalamidad, krisis, o uban pang balidong rason.
