Nakatala og pagkunhod ug miabot sa labing gamay nga lebel sulod sa siyam ka bulan ang paghinay sa salapi sa mga Overseas Filipino Workers (OFW) niadtong bulan sa Pebrero, apan nagpabilin gihapon nga mas taas ang kinatibuk-ang pondo nga misulod sa nasud karong tuiga.
Base sa gipagawas nga datos sa Bangko Sentral ng Pilipinas (BSP) niadtong Miyerkules, miabot lamang sa $2.786 bilyon (₱167.08 bilyon) ang natalang cash remittances o ang mga padala nga miagi sa bangko niadtong Pebrero.
Mas ubos kini kumpara sa $3.020 bilyon (₱181.11 bilyon) nga naitala niadtong bulan sa Enero.
Kini na ang labing gamay nga lebel nga natala sukad pa niadtong Mayo 2025. Bisan paman niini, mas taas gihapon kini gamay kung itandi sa $2.716 bilyon nga natala niadtong Pebrero sa miaging tuig.
Gikan sa kinatibuk-ang cash remittances alang sa maong bulan, $2.25 bilyon ang gikan sa mga land-based workers, samtang $0.53 bilyon ang giambag sa mga sea-based workers.
Bisan pa sa pagkunhod niadtong Pebrero, gibutyag sa BSP nga miabot gihapon sa $5.806 bilyon (₱348.19 bilyon) ang year-to-date cash remittances sa unang duha ka bulan sa tuig nga mas taas kumpara sa $5.633 bilyon sa susamang panahon niadtong 2025.
