Paimbistigahan na karon sa National Bureau of Investigation (NBI) ang giingong plano nga asasinasyon ni kanhing Pangulong Rodrigo Duterte batok kang Pangulong Bongbong Marcos Jr.
Sumala ni NBI Director Atty. Melvin Matibag, iyahang gipasusi usab ang pahayag ni Davao City Mayor Baste Duterte nga nag-ingon nga kinahanglan nila ang ulo sa Presidente.
Kahinumduman nga paglusad sa Reform Alliance for Good Governance and Accountability (RAGE) Coalition sa San Juan City, mibutyag si Mayor Baste Duterte nga usa lamang ka ulo ang ilang gikinahanglan nga mao ang ulo ni Pangulong Bongbong Marcos Jr.
Gilauman nga magpagawas ang NBI og memorandum ugma kabahin sa maong imbestigasyon.
Ang maong pahayag misunod kini human sa gipagawas nga pamahayag ni Palace Press Officer Claire Castro nga mandato sa NBI ang pag-imbestiga sa death threats batok sa Presidente, sama usab sa mga hulga batok sa ordinaryong katawhan.
Kahinumduman nga atol sa pagpakita ni Madriaga sa House Panel, gibutyag usab niini nga adunay giingong plano si kanhing Pangulong Duterte sa asasinasyon o kudeta batok kang Pangulong Marcos kon dili kini mokanaog sa pwesto pag-abot sa 2025.
Nakasulat kini sa supplemental affidavit ni Madriaga nga gisumite sa House Justice Committee nga nagpadayon sa impeachment proceedings batok kang Vice President Sara Duterte.
