Gikuwestyon ni Senador Bam Aquino ang Malacañang tungod sa giingong paglangan sa sugyot balaodnon nga nagtumong sa pagpalig-on sa transparency ug pagmonitor sa paggamit sa pondo sa gobyerno.
Samtang nag-atubang sa pagbaha ang Metro Manila, iyang gipunto nga makatabang ang maong panukala aron malikayan ang pagbalik sa susamang kontrobersiya sama sa flood control scandal.
Nabalaka ang senador sa pagkapukan sa Citizen Access and Disclosure of Expenditures for National Accountability (CADENA) Act, o mas nailhan nga Blockchain the Budget Bill, sa listahan sa mga prayoridad sa Malacañang.
Gikan sa ikatulong prayoridad kaniadtong 2025, nahimutang na lamang karon ang maong sugyot sa ika-41 nga ranggo sa mga prayoridad sa Legislative-Executive Development Advisory Council (LEDAC).
Wala matud pa dawata sa senador ang rason sa Department of Economy, Planning and Development nga gipamubo ang listahan aron unahon ang mga importanteng panukala nga sayon ra mapasar sulod lamang sa 12 ka bulan.
Matud ni Aquino, daghan nang grupo sulod ug gawas sa gobyerno ang nagpahayag sa ilang suporta alang sa maong bill.
“Alam ho natin lahat how powerful this bill can be… Nagtataka po ako, bakit parang hindi natin ’to minamadali?” sumala pa niini.
Para sa senador, panahon na aron ipadali ang CADENA Act ug mapalig-on ang hingpit nga transparency sa paggamit sa pondo sa katawhan.
