Nagpasidaan ang Department of Social Welfare and Development (DSWD) batok sa pagbiaybiay ug diskriminasyon sa mga Persons with Disabilities o PWD, ilabina sa mga indibidwal nga adunay autism ug uban pang neurodevelopmental condition.
Misunod kini human sa kontrobersiyal nga episode sa usa ka podcast nga gibatikos tungod sa giingong pagbiaybiay sa mga tawo nga anaa sa autism spectrum.
Sumala kang DSWD Assistant Secretary ug Spokesperson Irene Dumlao, dili madawat ang paggamit sa kapansanan sa usa ka tawo isip patuyang o paagi aron makakuha og atensyon ug engagement sa social media.
Gipasiugda niya nga katungod sa matag PWD ang dignidad, pagtahod ug proteksiyon sa ilang pribadong kinabuhi.
Ubos sa Magna Carta for Persons with Disabilities o Republic Act 9442, adunay katugbang nga silot ang mga buhat nga naglakip sa pagpakaulaw, pagbiaybiay o pagtamay sa mga PWD.
Giawhag pag-usab sa ahensiya ang mga content creator nga mahimong responsable ug sensitibo sa paghimo og mga materyal, ilabina kon may kalabotan kini sa mga bulnerableng sektor sa katilingban.
