DAVAO CITY – Napalabang na sa mga konsehal ning dakbayan sa Davao ang resolusyon nga nag-awhag sa mga division sa mga tulonghaan sa siyudad nga mangandam sa home study learning modules nga kabahin sa new normal samtang nagpadayon nga nakigbatok ang nasod sa krisis nga hatud sa corona virus disease.
Sumala pa kang konsehal Pilar Braga, committee chair on education, science and technology, arts and culture, mahinungdanon ang nahisgutan nga lakang ilabi na nga nagpabilin karon ang bahad sa COVID-19.
Kabahin sab sumala pa kini sa suspensiyon sa klase ug aktibidad samtang nangita ang education sector ug pamaagi aron nga masiguro ang kaluwasan sa mga magtutudlo ug estudyante.
Una ng gibutyag ni Jenielito Atillo, Department of Health XI (DepEd XI) spokesperson, nga dili pa kumpirmado kung kanus-a ang petsa sa pag-abli sa klase.
Apan gihan-ay na matud pa karon sa DepEd ang learning continuity plan, nga makatabang sa pagpangandam sa mga pribado ug pampublikong tulonghaan.
