Sikop sa kapulisan ang usa ka Regional Top 6 Most Wanted Person atol sa manhunt operation nga gipahigayon pasado alas-7:30 sa gabii niadtong Abril 2, 2026 sa Purok 1, Sitio San Vicente, Barangay Ruparan, Digos City, Davao del Sur.Ang suspek giila sa alyas Ruel, 28 anyos, ulitawo, usa ka panday/mason ug residente sa Purok 3, Barangay Cabaywa, Asuncion, Davao del Norte.
Sumala pa sa kapulisan, ang operasyon gipangulohan sa Asuncion Municipal Police Station ubos sa liderato ni PMAJ Collin S. Rama pinaagi sa ilang Warrant ug Intelligence personnel. Dugang pa niini, gitabangan kini sa DNPIDMU Tracker Team, DNPIU, 1101st Regional Mobile Force Battalion 11 ug 1st Davao Norte Provincial Mobile Force Company.Lakip sa giatubang nga kaso sa suspek mao ang duha (2) ka counts sa statutory rape ubos sa Article 266-A sa Revised Penal Code nga giamyendahan sa Republic Act 8353, ug lascivious conduct ubos sa Section 5(b) sa Republic Act 7610.
Sumala sa rekord, ang warrant of arrest gipagawas niadtong Marso 4, 2026 ni Hon. Jimmy Bustillo Boco, Presiding Judge sa Family Court, Branch 2, Eleventh Judicial Region sa Tagum City, Davao del Norte.
Sa pagkakaron, gidala una ang suspek sa Asuncion Municipal Health Center alang sa medical examination sa dili pa kini gipailalom sa kustodiya sa Asuncion Municipal Police Station alang sa hustong disposisyon.
Matud pa ni PCOL Glenn G. Cristines, iyang gidayig ang Asuncion Pulis sa ilang pagpanguna sa malampusong operasyon ug sa walay hunong nga paningkamot sa pagdakop sa usa sa mga most wanted sa rehiyon. Dugang pa niya, nagpakita kini sa lig-on nga kampanya batok sa krimen, ilabina sa mga kaso nga naglambigit sa pag-abuso sa kabataan.
Sa kasamtangan, gidasig usab sa kapulisan ang publiko nga magpabiling alerto ug makigtambayayong sa pagreport sa bisan unsang kriminal nga kalihokan, ilabina karong Semana Santa ug sa umaabot nga summer vacation.
