Gitudlo ni Pang. Ferdinand Marcos Jr. si kanhi Senador Francis Tolentino isip bag-ong kalihim sa Department of Labor and Employment o DOLE.
Mipuli kini kang Sec. Bienvenido Laguesma nga mikanaog sa pwesto tungod sa kahimtang sa panglawas human nagsilbi gikan 2022 hangtod 2026.
Si Tolentino usa ka abogado ug kanhi Senate Majority Leader nga nagsilbi sa Senado gikan 2019 hangtod 2025.
Sa wala pa ang iyang karera sa lehislatura, nahimo kining chairperson sa Metropolitan Manila Development Authority o MMDA ug nailhan sa iyang papel sa disaster preparedness ug urban management.
Samtang, si Laguesma usa ka beteranong opisyal nga nagsugod sa DOLE niadtong dekada 1970 isip labor arbiter.Nahimo siyang kalihim sa DOLE ubos sa administrasyon ni kanhi Pangulong Joseph Estrada gikan 1998 hangtod 2001, ug mibalik pag-usab sa maong posisyon sa administrasyon ni Marcos Jr. Niadtong 2022.
Nagsilbi usab siya isip commissioner sa Social Security System o SSS gikan 2011 hangtod 2016.
Ang appointment ni Tolentino miabot taliwala sa mga hagit sa labor sector, lakip na ang taas nga presyo sa mga palaliton, wage adjustments, proteksyon sa mga mamumuo, ug labor migration.
