Gikumpirma sa Philippine Nuclear Research Institute nga adunay pipila ka bahin sa usa ka steel manufacturing plant sa Tagoloan nga adunay “elevated radioactivity,” human sa alegasyon nga naghimo kini og substandard nga puthaw (bakal).
Sumala sa mga awtoridad, nadiskubre usab nga bisan pa sa peligro sa radiation, wala gihatagan og personal protective equipment (PPE) ang mga Pilipinong trabahante sa maong planta, samtang ang pipila ka undocumented Chinese workers sumala pa kompleto sa proteksyon.
Gipahayag usab sa PNRI nga tungod kay radioactive ang mga materyales, posible usab nga radioactive ang mga produktong puthaw nga gihimo sa planta, nga mahimong hinungdan sa seryosong peligro sa kaluwasan sa publiko.
Gibutyag usab nga ang maong planta, nga gituohang gipanag-iyahan ni Tony Yang, igsoon ni kanhi presidential economic adviser nga si Michael Yang, nagsugod og operasyon niadtong 2017.
Matod sa National Bureau of Investigation o NBI, padayon pa ang imbestigasyon sa gilapdon sa operasyon ug posible nga distribusyon sa mga produkto sa planta ilabi na dinhi sa Mindanao.
Padayon pang naningkamot ang Bombo Radyo Philippines sa pagkuha og pahayag gikan sa maong planta.
