Nangandam ang House prosecution panel sa mabinantayon nga preparasyon kalabot sa impeachment trial ni Vice President Sara Duterte sa Senado.
Subay sa pahayag ni Batangas Rep. Gerville Luistro, gibutyag niini nga daw balik-eskwela o balik-Bar examinations ang ilang sitwasyon tungod sa padayon nga pag-review sa rules on evidence ug uban pang legal nga proseso.
Dugang pa niini, nagpahigayon ang grupo og “prosecutors learning from prosecutors” session niadtong Miyerkules nga gipangunahan ni Rep. Chel Diokno, diin gipunting ang mga ebidensya ug mga pamaagi sa pagdumala sa kaso.
Lakip sa gihimo nga preparasyon, giandam na usab sa panel ang listahan sa mga testigo, mga dokumento, video, ug uban pang ebidensiya nga ipresentar base sa matag artikulo sa impeachment.
Sa kasamtangan, gipatin-aw ni Luistro nga dili lang mga papeles ang ilang ipasaka kondili lain-laing matang sa materyales nga makapalig-on sa ilang kaso atol sa pagdungog.
Matod pa niya, ang impeachment dili lamang simple nga legal nga proseso kondili usa ka mekanismo aron masuta kung ang usa ka taas nga opisyal angay pa bang magpabilin sa katungdanan.
