DAVAO CITY – Subling nagpahimangno ang Regional Anti-Cyber Crime Unit (RACU) ngadto sa publiko kalabot sa pagpakatag ug fake news nga adunay kalabutan sa COVID-19. Una ng gibutyag ni Col. Noel Espinoza, hepe sa Regional Anti-Cyber Crime Unit nga nakabase sa Camp Domingo Leonor sa San Pedro Street ning dakbayan nga ang mga violators mamahimong mag-atubang ug kaso nga adunay kalabotan sa RA 10175 o Cybercrime Prevention Act of 2012.
Tungod sa bahad sa COVID-19, gimandoan sumala pa sila nga moduso ug reklamo batok sa mga nagapakatag ug sayop nga impormasyon nga mamahimong hinungdan sa panic.
Padayon sab sumala pa karon ang cybercrime unit sa ilang pagmonitor sa social media, ilabi na sa Facebook alang sa mga indibidwal o grupo nga nagamugna o naga-share ug peke nga mga balita.
Nasayran nga makadawat sila ug report matag adlaw kalabot sa fake news diin kasamtangan nila nga gipang-verify kini aron nga madetermina ang mamahimong tulubagon sa mga nahisgutan.
