DAVAO CITY – Nagpahigayon kagahapon og reenactment ang National Bureau of Investigation 11 gawas sa usa ka bar ning syudad diin asa gipusil-patay ang 19-anyos nga si Amierkhan Mangacop.
Sumala sa abogado sa pamilyang Mangacop nga si Atty. Andrew Cabahug, mao kini ang tubag sa NBI sa hangyo sa pamilya sa biktima.
Dili matud pa mutuo ang pamilya ni Mangacop nga taga Cotabato City sa rason sa suspek nga si Dr. Marvin Pepino, usa ka PNP non-uniformed personnel nga doktor sa PRO-XI, nga self defense lamang ang gihimo niini.
Gikanayon ni Cabahug nga adunay mga witnesses nga maoy magpamatuod sa panghitabo apan wala kini gikuhaan og pahayag sa San Pedro PNP.
Matud pa, adunay tulo ka mga witnesses nga muhatag unta og pahayag ngadto sa PNP mahitungod sa panghitabo apan sila pa ang nahimong suspek sa pagpangulata matud pa kang Dr. Pepino.
Sumala kang Atty. Cabahug , daw nahimong biktima ang suspek nga si Pepino diin kinsa gikulata matud pa sa tulo ka tao.
Gibarugan ni Atty. Cabahug nga kinahanglan nga mag focus unta ang investigation ngadto sa pagpusil ni Pepino kang Amierkhan.
Dugang pa niya nga makita ug klaro sa mga CCTV ug cellphone videos nga si Mangacop wala nalambigit sa kagubot nga gikalambigitan ni Dr. Pepino ug uban pang indibidwal sa bar.
Gikatingalahan sab sa abogado kung ngano wala napugngan sa mga police nga naka-standby gawas sa bar ang gihimo ni Dr. Pepino.
Via || Hana Rallos
