Gilauman sa gobyerno sa Pilipinas nga mapagawas na ang desisyon sa ilang hangyo nga mag-isyu og Red Notice ang International Criminal Police Organization (INTERPOL) batok sa kanhi presidential spokesman Atty. Harry Roque.
Sumala pa ni Department of the Interior and Local Government (DILG) Secretary Jonvic Remulla, opisyal nang nahuman ang unom ka bulan nga proseso sa aplikasyon ni Roque alang sa asylum sa Netherlands niining semanaha. Busa, posible nga karong adlawa mahibaw-an kung pagahatagan o dili ang maong hangyo sa Red Notice.
Si Atty. Roque kasamtangan giingong wanted tungod sa kaso nga human trafficking nga dunay kalabotan sa ilegal nga Philippine Offshore Gaming Operator (POGO) hub nga lucky South 99 sa Porac, Pampanga. Nauna na nga mihangyo ang gobyerno sa Pilipinas sa pag-isyu og Red Notice batok kaniya niadtong Nobyembre sa miaging tuig.
Dugang pa niini, mihangyo usab og asylum si Roque sa Netherlands apan gi-report nga girefer siya ngadto sa Austria ilawom sa European Union’s Dublin Regulation, nga nagsulti nga ang unang nasod nga iyang gisudlan maoy responsable sa asylum application.
Sumala pa ni Remulla, kung dili pagahatagan og asylum si Roque, posible siyang palayason gikan sa maong nasod tungod sa kakulang sa travel documents ug sa iyang giatubang nga human trafficking case nga gidili sa tanang nasod.
