Gipasabot sa Malacañang Palace nga ang paspas ug lapad nga tubag sa gobyerno sa pagsaka sa presyo sa lana sa kalibotan resulta sa direktiba ni Presidente Ferdinand Marcos Jr. aron mapagaan ang epekto niini sa mga pamilyang Pilipino ug masiguro ang suplay sa enerhiya sa nasod.
Miabot kini human sa report sa Asian Development Bank nga nag-ingon nga ang Pilipinas usa sa pinaka-aktibong nasod sa Asia-Pacific sa pagpatuman og mga lakang batok sa pagtaas sa presyo sa krudo, bisan pa nga mikabat og hapit 60 porsyento ang pagsaka sa lokal nga presyo gikan Pebrero hangtod Abril tungod sa tensyon sa Middle East.
Subay sa report, pito sa walo ka mayor nga policy responses ang gipatuman sa Pilipinas, lakip ang targeted subsidies, ayuda sa transport sector, suporta sa vulnerable households, price monitoring, ug mga lakang aron maprotektahan ang fuel supply.
Dugang pa niini, gilunsad usab sa gobyerno ang temporary tax relief pinaagi sa Executive Order 114 nga nag-suspenso sa excise tax sa LPG ug kerosene sulod sa tulo ka bulan.
Sumala sa Palasyo, bisan dili makontrol sa gobyerno ang global nga presyo sa lana, mahimo nilang mapaspas ug mapalig-on ang ilang tubag aron malikayan nga mahimong “household disaster” ang global nga krisis.
Sa pagkakaron, nagpadayon ang gobyerno sa kombinasyon sa short-term relief ug long-term strategies sama sa pagpalambo sa renewable energy aron makunhuran ang pagsalig sa imported nga fuel.
