DAVAO CITY – Nagpaabot ug pahasubo si Police Regional Office 11 Regional Director Brigader General Benjamin Silo sa nagbangutang pamilya sa gipatay nilang sakop sa kapulisan nga si Police Staff Master Sargeant Rey Binalangbang.
Giubanan siya ni Davao de Oro Police Provincial Officer-In-Charge Police Colonel Benedicto Faco atol sa iyang pagbisita sa haya ni Binalangbang sa Montevista, Davao de Oro.
Gipaambit sa hepe ang iyang respeto ug simpatiya ngadto sa nabiyaang pamilya ug sa asawang si Alice Binalangbang. Nahatagan sab ang pamilya ug hinabang pinansyal sa PRO 11.
Unang nadestino si Binalangbang isip sakop sa Provincial Supply and Accountables Department sa Davao de Oro Police Provincial Office.
Napatay si Binalangbang atol sa insidente sa pagpamusil kaniadtong Setyembre 11, adlawng Dominggo diin napusilan siya sa wa mailhing armado sa makadaghang higayon hinungdan sa iyang hinaling kamatayon.
Una nang gikondena sa PRO 11 ang maong insidente ug kasamtangan pang ginapangita ang mastermind sa maong krimen.
VIA || Bombo LJ Florendo
