Giakusahan ni Vice President Sara Duterte ang administrasyon ni Pangulong Ferdinand Marcos Jr. sa pag-gamit sa mga alegasyon kalabot sa mga negosyo nga giingong adunay pondo gikan sa China, drug bust sa Laos ug giingong travel authority niini aron mapahawa siya sa puwesto.
Sa opisyal nga pahayag sa Office of the Vice President kaniadtong Martes, Oktubre 20, 2026 gipahayag ni Duterte nga gikonektar siya sa nagkalainlaing isyu nga, matod niya, gitumong aron ipakita nga hulga siya sa nasudnong seguridad. Dugang pa niini,napakyas ang prosecution team sa Kamara sa pagpamatuod sa mga alegasyon batok kaniya.
Gikuwestiyon usab sa bise presidente ang ebidensiya nga gigamit sa paglambigit kaniya sa maong mga isyu, lakip ang giingong koneksiyon tali sa usa ka negosyong adunay Chinese funding ug sa drug bust sa Laos nga komektado kuno sa usa ka Mindanao-Davao conspiracy.
Samtang, gihulagway ni Duterte nga fabricated o hinimo-himo lamang ang giingong travel authority nga nagpakita nga mibisita siya sa Laos. Ang maong dokumento kuno gigamit aron suportahan ang naratibo batok kaniya bisan wala kini kasaligang ebidensiya.
Gidugang sa bise presidente nga gipanghimakak usab sa Malacañang ang giingong travel authority sa iyang opisina.
Sa laing bahin, giklaro sa Department of the Interior and Local Government nga walay koneksiyon ang pamilya Duterte sa giingong drug bust sa Laos.
Nanawagan si Duterte sa gobyerno nga magpunting sa pagserbisyo sa katawhan imbes nga makiglambigit sa politika, ug iyang gihisgutan ang kalisod, kagutom ug kasuko nga giatubang sa mga Pilipino.
