Misamot pa sa kakusog ang Super Typhoon Rosal sulod sa Philippine Area of Responsibility o PAR, sumala sa pinakabag-ong monitoring sa state weather bureau nga DOST-PAGASA niining Miyerkules, Oktubre 21, 2026 sa kaadlawon.
Kataposang namatikdan ang sentro sa bagyo sa layong 990 kilometros sa sidlakan sa Northern Luzon, nga adunay kusog sa hangin nga moabot sa 215 kilometros matag oras ug paghaguros nga moabot sa 265 kilometros matag oras.
Naglihok ang bagyo paingon sa kasadpan-amihanan sa gikusgon nga 30 kilometros matag oras. Gilauman nga moduol kini sa Extreme Northern Luzon sa Huwebes o Biyernes ning semanaha, sa dili pa mogawas sa PAR sa Biyernes sa gabii o Sabado sa kaadlawon.
Samtang, gipahimutang na sa Tropical Cyclone Wind Signal No. 1 ang pipila ka lugar sa Luzon, lakip ang Batanes, Babuyan Islands ug amihanan ug sidlakang bahin sa mainland Cagayan.
Lakip sa mga lugar sa Cagayan ang Santa Ana, Gonzaga, Lal-lo, Santa Teresita, Camalaniugan, Aparri, Buguey, Gattaran, Baggao, Peñablanca, Santa Praxedes, Claveria, Sanchez-Mira, Pamplona, Ballesteros, Abulug ug Allacapan.
Naa usab sa Signal No. 1 ang amihanan-sidlakang bahin sa Isabela, lakip ang Maconacon, Divilacan, Palanan, San Pablo, Cabagan, Delfin Albano, Santo Tomas, Santa Maria, Tumauini, Ilagan City, San Mariano ug Dinapigue.
Lakip usab sa alerto ang amihanan ug sentrong bahin sa Apayao, lakip ang Calanasan, Luna, Santa Marcela, Flora, Pudtol ug Kabugao, ingon man ang Pagudpud ug Adams sa amihanan-sidlakang bahin sa Ilocos Norte.
Sa Catanduanes, gipahimutang usab sa Signal No. 1 ang amihanan-sidlakang bahin sa isla, lakip ang Pandan, Bagamanoc, Panganiban, Viga ug Gigmoto.
Padayon nga gibantayan sa PAGASA ang lihok ug kusog sa Super Typhoon Rosal. Gidasig usab ang publiko, ilabina ang mga residente sa mga lugar nga sakop sa wind signals, nga mag-andam ug mosunod sa mga pahimangno sa mga otoridad kabahin sa posibleng kusog nga hangin ug pag-ulan nga dala sa bagyo.
