Usa ka 11-anyos nga batang lalaki ang naangol human giingong dunggabon sa laing menor de edad sulod sa SIR Elementary School, nga nahimutang sa SIR Phase 1, Pag-asa Street, Sandawa, Barangay 76-A o Bucana, Matina, Davao City, alas 11:00 sa buntag niadtong Oktubre 21, 2026.
Ang biktima nga giila sa alyas nga “Prince,” 11-anyos, gidala dayon sa Southern Philippines Medical Center o SPMC alang sa medikal nga pag-atiman. Samtang, ang giingong nalambigit sa insidente nga giila sa alyas nga “Axel,” 13-anyos, gitugyan sa Women and Children Protection Desk o WCPD alang sa hustong interbensyon.
Base sa inisyal nga imbestigasyon, giingong nag-atubang og mga problema sa pamilya ug posibleng emosyonal nga kalisdanan ang 13-anyos nga menor de edad, nga kinahanglan pang susihon sa may katungdanang mga awtoridad. Gi-report usab nga naka-access kini og mga online application ug nakatan-aw og mga bayolenteng video content nga giugnay sa mga ngalan nga “Brenton Tarrant” ug “Arda Kuyemti.”
Narekober usab sa mga rumespondeng personnel ang naputol nga kutsilyo sa kusina nga giingong gigamit sa insidente. Padayon ang imbestigasyon ug koordinasyon sa mga hingtungdang ahensya aron matino ang tibuok sirkumstansya sa nahitabo.
