Gipalig-on sa Buhangin Central Elementary School SpEd Center sa Buhangin West District, Davao City, ang kampanya batok sa dengue pinaagi sa pag-induct sa bag-ong mga boluntaryo sa Dengue Task Force.Tumong sa maong lakang nga mapanalipdan ang mga estudyante batok sa dengue pinaagi sa hiniusang paningkamot sa mga magtutudlo, ginikanan ug komunidad.
Sumala kang School Principal Mary Germaine V. Alberto, responsibilidad sa tanan ang pagpugong sa dengue. Busa, giawhag niya ang school community nga magtinabangay sa pagmintinar sa kalimpyo sa palibot ug pagtangtang sa mga dapit nga mahimong pamahugan sa mga lamok nga nagdala sa maong sakit.Sukad matukod ang Dengue Task Force niadtong 2016, aktibong miapil ang mga ginikanan ug uban pang stakeholders sa pagpanglimpyo ug pagtangtang sa mga posibleng breeding sites sa lamok.
Gipahinumduman usab ang mga boluntaryo sa pagsunod sa 5S Strategy batok sa dengue: pagpangita ug paglaglag sa mga pamahugan sa lamok (Search and destroy breeding places); paggamit sa mga lakang sa pagpanalipod sa kaugalingon (Secure self-protection measures); sayong pagkonsulta kon adunay sintomas (Seek early consultation); pagsuporta sa fogging ug spraying kon gikinahanglan (Say yes to fogging and spraying when necessary); ug pagmintinar sa igong pag-inom og tubig (Sustain adequate hydration).
Pinaagi sa padayong kooperasyon sa eskwelahan, mga ginikanan ug komunidad, gilauman nga mapadayon ang limpyo, luwas ug himsog nga palibot alang sa tanang estudyante.
