Gipakusgan sa Police Regional Office XI ang kahibalo ug investigative skills sa mga personnel ug partner agencies batok sa online crimes nga nagtarget sa mga bata pinaagi sa lima ka adlaw nga Multi-Disciplinary Team–Basic Internet Crimes Against Children workshop.
Nahitabo ang maong training sa Pulis Bagani Hall, Camp Sgt. Quintin M. Merecido sa Buhangin, Davao City, uban sa City Social Welfare and Development Office ug International Justice Mission.
Mitambong sa workshop ang 151 ka partisipante, lakip ang 66 ka PRO 11 personnel ug representatives gikan sa partner agencies, ingon man 70 ka miyembro sa secretariat gikan sa International Justice Mission ug City Social Welfare and Development Office.
Gitudloan ang mga partisipante sa pagpalig-on sa ilang legal knowledge ug investigative skills, ilabi na sa husto nga pag-andam sa case documents ug paggamit sa tukmang tools sa pagkolekta og ebidensiya.
Sa maong aktibidad, gipasiugda usab ang trauma-informed ug victim-centered nga pamaagi aron mas sensitibo ug husto ang pagdumala sa mga kaso nga naglakip sa mga bata.
Tumong sa PRO 11 ug partner agencies nga mapalig-on ang inter-agency coordination ug masiguro nga ang mga kaso sa online exploitation madumala nga propesyonal, sensitibo ug patas.
Photo Courtesy: PRO XI
