DAVAO CITY – Misaka pa ngadto sa 15% ang positivity rate sa COVID-19 nga gikatala sa City Covid-19 Task Force, dinhi sa dakbayan sa Dabaw.
Taliwala kini sa nagpadayon nga pagsaka sa ihap sa kaso sa COVID-19 dinhi sa syudad.
Subay sa ulahing report sa COVID-19 task force, misaka na sa nasangpit nga porsyento ug nakatala pa og bag-ong 96 ka mga kaso sa COVID-19, diin mao ang usa sa labing-taas nga ihap sa bag-ong kaso nga natala sa usa ka adlaw sulod sa kapin lima ka bulan.
Sumala sa tigpamaba sa COVID-19 Task Force nga si Dr. Michelle Schlosser, taas na ang 15% nga positivity rate kung itandi sa 5% nga acceptable positivity rate o anaa sa safe threshold nga gikatakda sa World Health Organization.
Apan, sagad sa nagpositibo, mao ang asymptomatic ug mild cases apan dili angay mahimong kampante ang mga Dabawenyos tungod subay sa matag-semana nga report sa COVID Task Force, adunay natala nga duha ka severe cases ug lima ang natala nga namatay gumikan sa sakit.
Gumikan niini, subling giawhag usab ni Schlosser ang tanang dabawenyos nga magpabakuna ug magpa booster shot na, ug ugalion ang pagsunod sa minimum public health standards bisan nagpabiling luag ang restriksyon dinhi sa syudad.
Taliwala paman sa alert level 1 classification, kinahanglan gihapon ang proteksyon tungod hangtud adunay natala nga kaso sa COVID-19, magpabilin gihapon ang hulga sa pagkuyanap niini ug lakip na ang grabeng kondisyon nga makuha gikan sa sakit ilabi na sa dili pa bakunado.
Via || JENA MANGUIOB
