Gipahawa sa Philippine Coast Guard ang usa ka Chinese fishing vessel ug upat ka gagmayng bangka niini human makit-an sa territorial waters sa Lawak Island o Nanshan Island sa West Philippine Sea.
Sumala kang PCG Spokesperson Rear Admiral Jay Tarriela, balik-balik nga nanawag sa radyo ang mga personnel sa Coast Guard sa barkong Yuetaiyu 63168 samtang nakaangkla kini sa maong katubigan. Tulo ka higayon usab nga gilibotan sa rubber boat sa PCG personnel ang maong barko.
Apan, tungod sa kawalay tubag gikan sa Chinese vessel, gipahawa sa mga personnel sa Coast Guard ang upat ka gagmayng bangka nga anaa sa palibot niini.
Sa ulahi, mibalik ang mga gagmayng bangka ngadto sa ilang mother vessel, nga dayon mibayaw sa angkla ug mibiya sa katubigan sa Lawak Island. Wala usab nay natala nga insidente atol sa operasyon.
Pasiugda ni Tarriela nga sakop sa munisipalidad sa Kalayaan, Palawan, ang Nanshan Island ug dili mahimong mangisda ang mga langyawng sakayan sa territorial waters sa Pilipinas nga walay pagtugot.
Dugang pa sa PCG, ang paggamit sa gagmayng bangka gikan sa usa ka Chinese mother vessel alang sa pagpangisda sa maong katubigan giingong paglapas sa mga balaod sa Pilipinas, lakip ang Philippine Fisheries Code ug Philippine Maritime Zones Act.
