Gitangtang na sa posisyon sa National Police Commission ang pulis nga tag-iya sa government-issued firearm nga gigamit sa pagpamusil sa San Jose National High School sa Tacloban City kaniadtong Hunyo 22,2026 diin tulo ka estudyante ang namatay.
Base sa pahayag sa komisyon niadtong Miyerkules, Oktubre 14, gimandoan ang pagtangtang kang Police Staff Sergeant Arla Ray Paciencia, nga naka-assign sa Regional Finance Service Unit sa Eastern Visayas Police, tungod sa grave misconduct ug conduct unbecoming of a police officer.
Kahinumdoman nga gibilin ni Paciencia ang iyang service-issued nga 9mm pistol sulod sa usa ka plastic gun box nga gibutang sa plastic cabinet sa ilang balay, imbes nga itago kini sa usa ka safety vault. Supak kini sa mga lagda sa Philippine National Police bahin sa luwas nga pagtipig sa mga armas.
Sumala sa Napolcom, ang kapakyasan ni Paciencia sa hustong pagtipig sa armas nakatampo sa pagpanghitabo sa pagpamusil human naka-access niini ang iyang 14-anyos nga pag-umangkon.
Gibawi usab sa komisyon ang mga benepisyo nga kauban sa iyang posisyon ug gipahamtangan siya og diskwalipikasyon sa paghawid sa bisan unsang posisyon sa gobyerno.
Pinaagi niini, gipahinumdoman pag-usab sa Napolcom ang mga kapulisan nga obligasyon nilang sundon ang hustong pagdumala ug luwas nga pagtipig sa mga government-issued firearm aron malikayan ang pag-abuso niini ug ang posibleng peligro sa publiko.
