Giakusahan ni Vice President Sara Duterte ang administrasyong Marcos sa paggamit sa mga alegasyon kalabot sa China-funded business ventures, drug bust sa Laos ug giingong travel authority niini aron mapatalsik siya sa puwesto.
Sa opisyal nga pahayag sa Office of the Vice President niadtong Martes, Oktubre 20, gipahayag ni Duterte nga daw adunay pagbalhin sa naratibo sa gobyerno aron ipresentar siya isip hulga sa nasudnong seguridad, human mapakyas umano ang prosecution team sa Kamara nga pamatud-an ang mga alegasyon batok kaniya.
Gikuwestiyon usab sa bise presidente ang mga ebidensiya nga nagdugtong kaniya sa maong mga isyu. Gitawag niyang hinimo-himo o fabricated ang giingong travel authority sa Laos nga mikaylap sa publiko, ug miingon nga daw desperado ang mga nagtinguha nga iugnay siya sa drug bust sa maong nasud. Matod pa niya, gipanghimakak usab sa Malacañang ang giingong travel authority sa iyang opisina.
Samtang, giklaro sa Department of the Interior and Local Government o DILG nga walay koneksiyon ang pamilyang Duterte sa drug bust sa Laos. Sa kataposan sa iyang pahayag, giawhag ni Duterte ang gobyerno nga magpunting sa pagserbisyo imbes nga magpulitika, tungod kay daghan sa mga Pilipino ang nag-antos sa kakabos, kagutom ug kasuko.
