Hugot nga gikondena ni Pope Leo XIV ang nahitabong pagpatay sa liboan ka mga nagprotesta sa Iran ug mibalik sa iyang baruganan batok sa gubat.
Gibutyag niini atol sa press conference samtang pabalik sa Rome human sa iyahang upat ka nasud nga pagbisita sa Africa.
Matod sa Santo Papa, dili madawat ang pagkuha sa kinabuhi sa inosenteng sibilyan, ug isip usa ka espiritwal nga lider, dili siya mosuporta sa bisan unsang matang sa gubat.
Ang pahayag misunod sa komento ni US Pres. Donald Trump nga nangutana nganong wala dayon mipahayag ang Santo Papa kabahin sa sitwasyon sa Iran.
Bisan wala niya kini direktang gitubag, iyahang gipalig-on ang iyahang posisyon batok sa mga pagpanglutos ug gubat.
Gibutyag usab niini nga ang nagpadayon nga tensyon tali sa Estados Unidos ug Iran ang nagdala og dakong kalisod sa ordinaryong katawhan.
Gilarawan usab niini ang ceasefire nga samok ug walay klarong direksyon.
Sa laing bahin, gidepensahan ni Pope Leo ang iyahang pagbisita sa Africa, nga sumala pa gitumong sa hilom nga pagpalambo sa hustisya ug kahimtang sa katawhan.
Sa katapusan, nanawagan kini sa mga lider sa kalibutan nga unahon ang kaayohan sa katawhan ug ipatigbabaw ang malinawon nga solusyon imbis nga musalig sa pwersang militar.
