Dili maagian sa tanang klase sa sakyanan ang main road sa Barangay Kanaan, Kaputian District, Island Garden City of Samal (IGaCoS), human mahitabo ang pagdahili sa yuta karong Dominggo, Nobyembre 1, 2026.
Pinaagi sa pahimangno, giawhag sa Samal City Disaster Risk Reduction and Management Office (CDRRMO) ang mga motorista ug residente nga likayan ang apektadong lugar ug mag-amping sa ilang pagbiyahe tungod sa posibleng peligro.
Gikumpirma usab sa CDRRMO nga walay motorista o residente nga naapektuhan sa maong insidente.Samtang, nagpadayon ang clearing operation sa lugar aron matangtang ang mga natumpag nga yuta ug uban pang sagabal nga nakatabon sa dalan.
Gipahimangnoan usab ang publiko nga dili mosulay sa pag-agi sa maong karsada hangtod nga mahuman ang clearing operation ug makumpirmang luwas na kini alang sa mga motorista.
