Nanawagan si Senador Francis “Kiko” Pangilinan kang bag-ong Supreme Court Chief Justice Rodil Zalameda nga ibalik ang pagsalig sa katawhan sa sistema sa hustisya sa nasod.
Si Zalameda ang mipuli kang Chief Justice Alexander Gesmundo nga nagretiro karong Biyernes,Nobyembre 6, 2026 human kini gitudlo ni Pangulong Ferdinand Marcos Jr.
Matod ni Pangilinan, usa sa dagkong hagit sa bag-ong punong mahistrado ang pagpanguna sa mga reporma sa hudikatura aron mapadali ang pagsulbad sa mga kaso, masiguro ang patas nga pagpatuman sa balaod ug mapalig-on ang pagpanubag sa mga opisyal.
Gipunting sa senador ang panginahanglan sa mga reporma human makuha sa Pilipinas ang ika-97 nga ranggo sa 143 ka nasod sa 2026 World Justice Project Rule of Law Index.
Gilauman ni Pangilinan nga unahon ni Zalameda ang pag-atubang sa nagtapok nga mga kaso sa mga korte.
Lakip sa iyang gisugyot ang pagtakda og klaro ug masukod nga mga tumong, pagdugang sa mga korte sa mga lugar nga kulang niini, pagpakunhod sa gidaghanon sa mga kaso nga dumalahon sa matag huwes ug pagpuno sa mga bakanteng posisyon sa hudikatura.
Nanawagan usab siya nga dapat walay luna ang korapsyon sulod sa hudikatura, ilabi na sa proseso sa pagtudlo ug pagpataas sa ranggo sa mga opisyal, pagmonitor ug pagdisiplina sa mga nakalapas.
Dugang pa, gisugyot ni Pangilinan ang pagpatawag pag-usab sa Judiciary Executive Legislative Advisory and Consultative Council aron mapalig-on ang koordinasyon sa tulo ka sanga sa gobyerno.
Samtang, gikalipay usab ni Senate Majority Leader Juan Miguel “Migz” Zubiri si Zalameda sa iyang pagkatudlo. Nagpahayag siya og pagsalig nga ang dugay nang kasinatian sa bag-ong punong mahistrado sa serbisyong publiko ug hudikatura nga makatabang sa pagpangulo sa Korte Suprema nga may kaalam, integridad, ug hugot nga pagpanalipod sa hustisya.
