Misurender na sa National Bureau of Investigation (NBI) ang mag-asawa gikan sa San Jose del Monte, Bulacan nga gikontak sa Ahjay Paws Aftercare Pet Crematorium sa Bacoor, Cavite aron mohimo sa cremation sa mga patayng hayop.
Gibutyag ni NBI Director Melvin Matibag nga wala matuman sa mag-asawa ang gikasabotang serbisyo human dinaghan nga patayng lawas sa mga hayop ang ipadala kanila gikan sa Cavite pinaagi sa courier.
Matod pa, tungod kay wala na silay kapasidad sa pag-cremate sa tanang gipadala, gilubong ug gilabay nalang nila ang ubang mga hayop sa tulo ka magkalaing dumpsite sa Bulacan.
Unang nadiskubrehan kaniadtong Oktubre 31 ang 29 ka patayng lawas sa mga iro ug iring nga gisulod sa mga plastic bag ug sako ug gilabay daplin sa dalan sa San Jose del Monte.
Sumala sa NBI, miabot na sa 49 ka patayng binuhi ang opisyal nga nalambigit sa mag-asawa, lakip ang mga bag-ong nadiskubrehan sa ubang dapit sa Bulacan. Hinuon, nagduda ang pipila ka animal welfare group nga mas daghan pa niini ang posibleng gilabay sulod sa duha ka tuig nga operasyon sa crematorium.
Natino na sa NBI ang koneksiyon sa mag-asawa ngadto sa maong pasilidad, ug gipasa na sa Department of Justice ang reklamo ug mga ebidensiya.
Gipangandaman usab sa NBI ang pagsang-at og hangtod unom ka kasong kriminal, lakip ang estafa ug paglapas sa Consumer Act. Samtang, gipailalom sa forensic examination ang mga narekober nga abo ug patayng lawas aron matino kung kang kinsang mga binuhi kini.
