Nakadawat na ang Philippine National Police (PNP) og mga tawag gikan sa publiko sukad gilusad ang hotline alang sa paghatag og impormasyon sa posibleng nahimutangan ni Senator Ronald “Bato” Dela Rosa.
Sumala kang PNP Deputy Chief for Administration Lt. Gen. Wilson Joseph Lopez, hugot nilang gisala ug giberipika ang matag impormasyon nga nadawat aron masiguro ang katukma niini.
Gibantayan usab sa kapulisan ang mga lugar nga posibleng adtoan o tagoan sa senador aron mapadali ang iyang pagdakop.
Nakigtambayayong na usab ang PNP sa nagkalainlaing ahensya sa gobyerno, lakip na ang Armed Forces of the Philippines (AFP), aron mapalapad ang pagpangita sa senador.
Samtang, padayon ang manhunt operation sa kapulisan ug gipahimutang na usab ang mga tracker team sa tanang 18 ka rehiyon. Nagtuo usab ang PNP nga wala pa makagawas sa Pilipinas si Dela Rosa.
Gipasidan-an usab sa kapulisan nga mahimong pasakaan og kaso ang mga tawo nga mogamit sa hotline alang sa mga peke o binuang nga tawag.
Bisan pa sa padayong pagpangita, mas maayo nga boluntaryong mosurender ang senador aron malikayan ang posibleng “madugong” engkuwentro.
Nanghangyo si Lt. Gen. Lopez kang Dela Rosa nga mosurender na lamang siya sa malinawong paagi, ug gipahinumdoman kini sa iyang kanhing papel isip usa ka opisyal sa PNP nga dili unta ibutang sa peligro ang mga pulis nga nagpatuman sa ilang katungdanan.
Apan, lahi ang baroganan sa kampo sa senador. Giingon sa iyang abogado nga si Atty. Israelito Torreon nga walay lig-on nga legal nga basehan ang manhunt operation sa lokal nga mga awtoridad tungod kay wala pa kuno magpagawas ang Interpol og Red Notice batok sa iyang kliyente.
