Gipahibalo ni Israeli President Isaac Herzog nga karong Domingo, Nobyembre 8,2026 niya ipahibalo kung kinsang myembro sa parlamento ang iyang mandoan sa pagporma sa sunod nga gobyerno sa Israel, human sa konsultasyon sa mga lider sa nagkalainlaing partido.
Matod ni Herzog, 67 ka myembro sa parlamento ang misuporta kang kanhing military chief Gadi Eisenkot, samtang 46 ang mipabor kang incumbent Prime Minister Benjamin Netanyahu. Pito usab ka magbabalaod ang nag-abstain o wala mipili og kandidato.
Bisan pa nga mas daghan ang suporta nga nadawat ni Eisenkot, nagpabiling dili klaro kung kinsa ang makahimo og lig-on nga koalisyon aron makabuo og mayorya sa parlamento.
Nahitabo kini human walay kandidato nga nakakuha og klarong kadaugan sa nasudnong eleksiyon niadtong Oktubre 27.
Lakip sa mga hinungdan sa kalisod sa pagporma og gobyerno ang nagkalahi nga baruganan sa mga partido, ilabi na sa posibilidad nga mosalig si Eisenkot sa suporta sa mga Arab-led party, nga gisupak sa pipila ka lider sa right-wing opposition.
Sa higayon nga mopili na si Herzog karong Domingo, hatagan ang napiling kandidato og 28 ka adlaw aron makaporma og koalisyon, nga mahimo pang dugangan og 14 ka adlaw kon gikinahanglan.
Samtang wala pa maporma ang bag-ong administrasyon, magpabilin si Netanyahu isip pangulo sa caretaker government.
