Gipangayo ni Senator Francis “Kiko” Pangilinan ang hugot nga pagbantay ug pagpahamtang og angay nga silot batok sa mga tigtipig og daghang suplay sa pagkaon, mga mapahimuslanon sa presyo ug mga kartel sa pagkaon tungod sa hulga sa grabeng El Niño nga posibleng makaapekto sa produksiyon sa agrikultura ug mopataas sa presyo sa mga batakang palaliton.
Isip chairman sa Senate Committee on Agriculture, nanawagan si Pangilinan sa Department of Trade and Industry (DTI), Department of Agriculture (DA), Price Coordinating Council (PCC) ug uban pang may kalabotang ahensya nga palig-onon ang pagbantay sa mga merkado ug siguruhong ipatuman ang price freeze sa mga lugar nga gideklarar nga naa sa state of calamity.
Ubos sa Republic Act 7581 o Price Act, nga giusab pinaagi sa Republic Act 10623, awtomatikong ipatuman ang price freeze sa mga batakang panginahanglanon sa mga lugar nga gideklarar nga naa sa state of calamity.
Gipasiugda ni Pangilinan nga kinahanglan imbestigahan ug pasakaan og kriminal ug administratibong kaso ang mga indibidwal ug kompanyang nalambigit sa pagtago sa suplay, pagpahimulos sa presyo ug pagmaniobra sa merkado.
Matod pa sa senador, dili lamang ang mga tindero ang angay manubag, kondili apil usab ang mga tag-iya sa dagkong negosyo nga anaa sa luyo sa mga sindikato.
Dugang pa ni Pangilinan, kinahanglan siguruhon sa gobyerno nga adunay igong suplay sa pagkaon ug hugot nga bantayan ang presyo niini aron mapanalipdan ang mga konsumidor, ilabina sa posibleng epekto sa El Niño sa produksiyon sa agrikultura.
