Miabot na sa kapin 5,000 ang ihap sa mga namatay tungod sa Ebola outbreak sa Democratic Republic of Congo, samtang kapin 10,000 na usab ang natakdan sukad sa Mayo ning tuiga.
Sumala sa datos nga gipagawas sa gobyerno, walo na sa 26 ka probinsya sa nasud ang naapektuhan sa maong sakit, diin daghan sa mga biktima ang namatay nga wala pa maabot sa mga sentro sa pagtambal.
Ang maong outbreak gipahinabo sa Bundibugyo strain sa Ebola virus nga maoy hinungdan sa Bundibugyo Virus Disease o BVD. Sa pagkakaron, wala pa’y aprubadong tambal o bakuna batok sa maong matang sa virus.
Giisip kini nga ikaduha sa kinadak-ang Ebola outbreak sa kasaysayan sa kalibotan, sunod sa epidemya niadtong 2014 hangtod 2016 nga mikaylap sa Guinea, Liberia ug Sierra Leone.Atol sa maong epidemya, mikabat sa dul-an 28,600 ang natakdan ug hapit 11,000 ang namatay.
Dugang pa, nakarekord usab og mga kaso sa Ebola ang ubang nasod sa Africa. Lakip niini ang Nigeria, nga nahimong ikaupat nga nasod sa kontinente nga nagreport og kaso sa maong sakit niadtong miaging Domingo, ingon man ang Kenya ug Uganda.
Sa kasamtangan, nagpadayon ang pagmonitor sa mga awtoridad sa pagkaylap sa virus aron mapugngan ang dugang nga impeksiyon ug pagkamatay.
