Mimugna na ang Philippine National Police (PNP) ug special teams uban ang top investigators aron nga tumbukon ang mga indibidwal nga mitabang sa pagtago ni KOJC founder Apollo Quiboloy nga nag-atubang sa mga kaso nga child, sexual abuse ug qualified human trafficking.
Pipila sa nag-unang tahas sa team ang pagpangalap ug pagberipika sa mga social media post, publications, ug uban pang impormasyon kabahin kang Quiboloy, pag-validate ug authenticate sa nasampit nga mga materyal pinaagi sa ACG, pagpangalap ug mga pamahayag ingon man affidavits gikan sa mga gingsakpan sa PNP nga kauban sa pagsilbi sa arrest warrant batok kang Quiboloy, pagkuha sa mga testimoniya gikan sa mga biktima ug complainants lakip ang pagkolekta sa documentary evidence gikan sa ubang mga ahensiya nga magpakusog sa kaso.
Gipalihok na sab ang bulag nga tracker team aron nga pangitaon si kanhing presidential spokesperson Harry Roque nga adunay detention order gikan sa Kamara.
Kini human nga ma-cite in contempt sa ikaduhang higayon si Roque human nga mibalibad kini nga magsumite sa mga gipangayo nga dokumento aron i-justify ang pagtubo sa iyahang kabtangan nga gilambigit sa ilegal nga POGO.
Sa usa ka pamahayag, gikanayon ni PNP chief Police Gen. Rommel Marbil nga ilahang ipahigayon ang operasyon sa pagtgukod sa mga coddler ni Quiboloy ug kang Roque nga nahisubay sa balaod.
Una ng gibutyag sa PNP chief nga dili makatago si Quiboloy gikan sa mga awtoridad kung wala’y mitabang ngadto kaniya.
Samtang, mimugna pa gihapon si PNP-Criminal Investigation and Detection Group (CIDG) Director Leo Francisco ug usa ka special composite team nga gilangkuban sa CIDG ug Anti-Cybercrime Group (ACG) officials alang sa pagpasaka ug kaso batok sa mga indibidwal nga mitabang kang Quiboloy.
