DAVAO CITY – Gikumpirma sa Davao City Police Office nga gi-relieve sa ilahang pwesto ang pito ka mga PNP personnel nga nalakip sa gilusad nga anti-drug buy-bust operation sa managlahing lugar sa Davao City nga miresulta sa pagkapatay sa pito ka mga suspect nga gitohang misukol sa mga otoridad human sa nahimong pagpaaktibo sa war on drugs ni Davao City Mayor Sebastian Duterte.
Sumala sa kapulisan nga nahisubay kini sa mando sa PNP headquarters kon asa gipaimbestigahan kini ni PNP Chief Benjamin Acorda Jr. Kasamtangang nakakustodiya ang mga na-relive nga mga personahe sa opisina sa DCPO.
Sumala sa talaan sa PNP gikan Enero 1 hangtod Marso 25 ning tuiga, 28 ka indibidwal ang napatay sa operasyon batok sa ilegal nga drugas sa Davao City; diin 7 ang patay sa operasyon niadtong Marso 22 hangtod 26; samtang 17 ang nasikop sa 21 ka anti-illegal drug operations nga gipahigayon sa dakbayan.
Dugang pa niini, anaa sa 22 ka mga kaso ang napasaka nila sa piskalya.
Nasakmit usab sa kapolisan sa Davao City ang gibanabanang P1.3 milyones nga kantidad sa shabu ug 7 ka mga armas.
Sa pikas bahin, gipaklaro karon sa Davao City Police Office nga mas daghan mga tigpayuhot og ilegal nga droga ang mitahan sa mga otoridad kaysa nakabsan sa kinabuhi matag buy-bust operations.
Gikanayon ni DCPO Spokesperson Police Captain Hazel Tuazon, dili na bag-o sa kapulisan sa Davao City nga dunay makabsan sa kinabuhi samtang ginalusad ang mga buy-bust operation.
Hinuon, mas ubos pa ang natalang operasyon kontra ilegal nga droga ning kasamtangang tuig nga niabot sa 274, kon itandi sa susamang panahon ning milabayng tuig nga anaa sa 302.
Dugang pa sa opisyal nga sagad sa mga nanlaban atol sa operasyon ang naghupot ug kalibre .38 nga revolver gumikan barato kini nga mapalit kon itandi sa daghang kalibre sa pusil.
Mismong ang PNP National Headquarters na ang nag-ingon nga gibarugan sa DCPO nga lehitimo ang ilang gihimong operasyon apan abli gihapon sila sa imbestigasyon.
via || Bombo LJF
